Manipur a·doko so·sojengjeng ong·anirangko champengna aro nama bewalo namgrikataina da·onaba man·kujaenganina National People’s Party (NPP) dol N. Biren Singh-chi dilenggipa BJP sorkarina chakpaaniko ra·galna Robibar salo tik ka·angaha.
Biren Singh-ni dilenggipa BJP sorkari a·doko niamrangko ja·rikna man·jani a·selo, batanggimin salrangni gisepon a·doko obostarang namjabatroroaniko nikna gita man·angaha jeon bang·a dosgri manderang an·tangtangni janggitangko gimaatna nangan baksana bilongen saknaanirangko man·e neng·nikanirangkoba chagrongna nangengaha ine NPP ni National President Conrad K Sangma, BJP-ni National President Jagat Prakash Nadda-na seatgipa chittio janapangaha.
Ia da·o ong·enggipa obostarangko nigrike BJP dolni dilenggipa sorkarina chakpaaniko ra·galna tik ka·angaha ine Conrad Sangma aganangaha. Manipur-ni ge 60 Legislative Assembly-o NPP-ni sak 7 MLA san dongani gimin BJP sorkarina chakpaaniko ra·galgenchimoba maming neng·nikani ong·jawa maina BJP dol gipinrangna bate bang·bate MLA-rang dongkuenga ineba Conrad Sangma agandapangaha.
