Ru·utbea salrangoni NEHU-ni damgni campus-ni adita nang·anirangko university-o poraienggipa chatro chatrirang dabiani gisepo NEHU-ni Vice Chancellor, Executive Council-ko ra·chakange Tura campus-na Garo Department-ni Prof. Fameline K. Marak-ko Pro Vice Chancellor songangaha.
Tura NEHU campus-o chatro chatrirangni dabienggiparangara, a·doktangoni Pro Vice Chancellor-ko songchina jekon da·o ra·chakaha, unbaksana kamni kri apsangrik man·anirangko on·china, Registrar-ko rakkichina, department-rangko kulidapchina aro Post Graduate Students’ Union (PGSU) ni election-ko ta·rake ong·atchina jingjengataniko dakenga.
University-o sosojengjeng ong·anirang Shillong campus-oni a·bachengbae joljol Tura campus-onaba batrorobaaha. Tura campus-o jingjengatani adita salrangoni ong·genchimoba bang·an chong·moton chatro chatrirang ku·cholsan ong·anichi miksongani bil·akdapangaha. Iasan ong·aigija Garo Students’ Union (GSU) aro Garoland State Movement Committee (GSMC) dolrangba ia ja·ku ga·anina bakrimaniko on·angpaaha.
