Central Recruitment Board (CRB), Meghalaya Police-ni kamrangna Physical Efficiency Test (PET) ko ong·atna manchie dongimin tarik baksa apsan salo bang·a chadamberang university, board aro college porikkarang donge neng·nikaniko man·genchimode PET Centre In-charge-ko re·ange grongchinagita IPS Dalton P. Marak u·iatangaha.
Physical Efficiency Test (PET) ko ra·na Central Recruitment Board (CRB) ni on·gimin Physical Efficiency Test (PET) ni admit card-ni photo copy, college/board/ university porikkani admit card-ni photo copy aro college/board/university-ni porikka ong·ani tarikni sakkiko mesokgipani photo copy-ko on·chinagitaba parakataha.
Ia pilak on·gimin lekka pancharangko name nianiko dakani ja·mano chatro chatrirangna dingtangmancha Physical Efficiency Test (PET) ko ra·na dingtang salko manchie donanggen aro chatro chatrirang chang·sasan PET-ko ra·ani salko dingtangatna man·gen, changni chang salko dingtangataniko ra·chakjawa ineba u·iataha.
Physical Efficiency Test (PET) ka·ani tarik aro centre-ko dingtangatna dorgasto galaniko bon·kame November 18, 2024 tarikona ra·chakanggen. Una agreba Admit Card/ Physical Efficiency Test (PET) ni tarik aro centre-rangko talbate masina sikgenchimode Central Recruitment Board (CRB) office ba helpline number 6033164273 ona office-ni somoio ka·ate sing·atna man·gen ineba u·iatangaha.
