NEHU Tura campus-o Prof. P. B. Shukla-ko Vice Chancellor kamoni watako nangnike aro niamni a·palo Sujata Gurudev-ko campus director songanina chatro chatrirang dontonggija jingjengate jegalaniko dakna tik ka·angaha. Uamang baksa GSU aro Garoland State Movement Committee (GSMC) bakrimaniko on·angenga.
NEHU-ni namroro silroroanina sapgija aro uamangni ka·dongna man·gipa dilgipako on·china, aro dingtanganiko ra·bana chatro chatrirang dabiatangko on·ja dipet neng·takgija jingjengatna miksonganiko aganangaha. Re·baenggipa somoirangna sapgijagipa dilgiparangko nanggija kakketgipa dilgiparangkosa nanga ine chatro chatrirang parakangaha.
NEHU Shillong-oni jingjengatanirang a·bachengbae da·o NEHU Tura campus-oba apsan dakgipa neng·nikanirang aro nanganirangna dabianiko dakenga. Ia dabienggipao uamang Shillong aro Tura campus-o a·doktangoni Pro Vice Chancellor-ko songchina, kamni kri apsangrik man·anirangko on·china, Registrar-ko rakkichina, Tura campus-o department-rangko kulidapchina aro Post Graduate Students’ Union (PGSU) ni election-ko ta·rake ong·atchina parakangaha. Ia dabianirangko uamang changni chang VC-na memorandum-ko on·manahaoba maming ja·ku de·a dongjaha ine u·iatangaha.
