SGH Gasuapara C&RD block-ni ning·o dingtang dingtang songrangni VEC-rang MGNREGA scheme-ni man·a nanggipa tangkarangko man·kujaenganina ta·rakale uamangna on·china President aro Secretary-rang Rural Employment Society Shillong-ni Mission Director, S C Sadhu-ko didiataha.
Ia mamlani bidingo re·aanggipa November 1 tariko bang·a songrangni VEC-rang Gasuapara kal·chakram biapo tom·e chanchirimanikoba dakangaha. Uamangni chittio see janapatanigitade kamrangko dongimin somoio matchotataha aro nanggipa lekka pancharangkoba on·manaha ine u·iataha. Ge·etagitaan Aaadhar card-rangkoba bank account baksa nangdimatmanaha aro sianggipa manderang jemangan nangdimatna man·gijagiparangnaba death certificate-rangko official-rangna pakwatmanaha.
Indake ong·genchimoba, re·anggipa bilsionin chong·motan ja 14 batangpilahaoba uamang an·tangtangni kam ka·gimin MGNREGA scheme-ni tangkarangko man·kujaenga. Man·a nanggnirangko uamangna on·kujaengani a·sel songadamrango salantio ia tangkarango pangchake hajalni hajal kam ka·e cha·enggiparangna namen neng·nikaniko ra·baenga ine VEC dolrang parakataha.
