Tura songjimani adita chel·ao donggipa Chibragre songo A·chikrangni bebe ra·agita pattigipa ra·rongipa Misi Saljong-ko mittelpilna manirongenggipa chang 48-gipa Wangalako November 7-oni 9 tarikona ong·atna tik ka·aha. Ia chang Wangalao Garo Hills-ni dingtang dingtang song nokrangoni dol 10 mang chrokgiparang bakko ra·e skanggipa, gnigipa aro gittamgipa biapna susaanggen.
Nagaland aro Assam a·dokoniba ia chango bakko ra·e jatni chrok mesaani aro doka dam·aniko mesokangnasienga. Indake ong·genchimoba uamang Wangalao chegipa ong·na susagrikanggija ia manianiko ansoadapatnasa bakko ra·angenga. Batanggimin changoba Bangladesh a·songo donggipa A·chikrangni Wangala dolrang re·bae chrok mesaaniko nikangaha.
Re·anggipa chango re·rurana rama watanio dakgualaniko gisiko done, ia chango napchakaniko NEHU Rural Development department-ni Fishery Pond donggipagita re·atna tik ka·aha. A·damoni re·angpilengon gitcham Ganol rama jean Chibragre picnic spot-ko napake Goeragre-o NH 51-ko man·egipa ramako jakkalskachina u·iataha.
Skanggipa salo Handloom aro Handicraft exhibition-ko a·bachengate, OPATA aro ASA NEHU-oni dolni chrokani, bol 100 damako doke mesokani (Introductory round) aro Master Chef Competition-ko ong·atanggen. Gnigipa salo Dimdim Dimchong Dadichong gitko ring·ani, Tura Dance Academy-ni chrokani, Rugalaniko dakani, dama 100-ni skanggipa round aro folk song ringsusaaniko ong·atanggen. Bon·kamgipa salo dol 10 Wangalgipa dolrang dama doke chroke dolsa dolgipin baksa chegipa ong·na susaaniko nikna man·gen. Una agreba cha·chat so·ani aro dingtang mancha Aransha aro Sheryll-ni git ring·anikoba nikanggen.
