Da·al salo SGH Gasuapara C&RD block-ni ning·o dingtang dingtang songrangni VEC-rang MGNREGA scheme-ni man·a nanggipa tangkarangko man·kujaenganina Gasuapara kal·chakram biapo tom·aniko ong·ataha. Man·a nanggnirangko uamangna on·kujaengani a·sel songadamrango salantio ia tangkarango pangchake hajalni hajal kam ka·e cha·enggiparangna namen neng·nikaniko ra·baenga.
Iani bidingo sing·sandianiko dakon BDO-ni agananigitade tangkarangko man·ingijani a·selara aadhar card baksa bank account-rangko nangdimatkugijagipa manderangna death certificate-rangko joma ka·kujaengani gimin ja·manchakenga ine uamangna u·iataha. Indake ong·genchimoba mitamrangna death certificate-ko on·manani ja·manoba tangka man·a nanggnirangko da·onaba on·kujaenganiko uamang parakataha.
Tom·ani bako dilgiparang aro VEC member-rang koborna parakatengon, MGNREGA scheme-ko dingtang mancha songadamrango manderangna kamrangko on·e cha·asiako chel·atna ra·bagipa ong·ani gimin name chalaichina aganangaha. Ia somoio uamang jinma ku·cholsan daito ga·akgipa department-na chittiko sedoatnaba tik ka·angaha aro man·a nanggnirangko ta·rake sokatpachina didiangaha.
