Tura, Oct 25, 2024: Meghalaya a·dokni skanggipa Skotong Minister aro GHADC-ni CEM ong·chenggipa Captain Williamson Ampang Sangma-ni chang 34-gipa siani salko da·al October 25 tarik Sukrobar salo gisik ra·e, GHADC office mikkango maniangaha.
Capt Williamson Ampang Sangma 1990 bilsini October 25 tariko an·tangni ka·sagipa jik dedrang, mahari ma·drang aro ripengskarangko wate jringjrotna neng·takram biapona re·angaha. Da·alo ua a·gilsako dongjahaoba, uni Meghalaya a·dokna aro jatna dangdike on·anggiminrangko gisik ra·e, uni bimangko tarie donram biap Tura William Point-o aro uni gopramo nitogipa bibalni chokchimrangko donne, nokdangni manderang, Mondolini dilgiparang, MDC-rang, GHADC-o kam ka·giparang aro Pulisrang uko mande ra·e manianiko dakangaha.
Ua saksa A·chikrangni gisepo niksenggipa political dilgipa ong·e, Meghalaya a·dokko man·na krengbee dakgrikdilangenba, Meghalaya a·dokko man·e on·angaha aro ua an·tangan Meghalaya a·dokni skanggipa Skotong Minister-ba ong·chengaha. Indake ua Meghalaya a·dokni manderangna dangdike on·angaha. Unbaksana, Capt. Sangma Salgro Salaram a·dokrangni gisepo skanggipa Tribal manderangoni Governor-ba ong·chengaha.
Uni janggi tangmiting salrango ua neng·takpilgija, a·brio janggi tanggipa tribal manderangni dakbewal rikbewal ba jatni identity-ko ripingna raken kamrangko ka·dilangaha. Uni ripinganggimin tribal manderangni pilak jatni dakbewal rikbewalrang aro jatni niam retirangko gimaatgija ripingangna aro uni ja·kurangko ja·rike kamrangko ka·na nangenga, ine GHADC-ni Deputy CEM Nikman Ch.Marak tom·anio mongsonggipa sokgipa ong·e jinmana aganprakangaha.
