Garobadha Regional Unit-ni A∙chik State People’s Front (ASPF) adita salrangna skang DSC ni kamna nakatatgipani bidingo manderangni matnanganirangko knae South West Garo Hills ni Deputy Commissioner (DC) na chitti-ko sedoataha.
DSC ni kamna nakatatani ja∙mano kam sandienggiparangna ka∙dongataniko ra∙bagenchimoba kamna rimnapanio mikkang niteesa kamrangko on∙enga ine manderang matnangatokaha. Batanggimin 2018 bilsio DSC Grade IV ni kamna galna dorgasto galna u∙iatani gisepon bilsi 6 na kingking ra∙doate da∙o apsan kamna adita salrangna skangsan porikka seataniko dakangaha.
Re∙anggipa changrangoba DSC ni kamrangna rimnapanio kragijagipa bewalo aro mandetangrangkosa rimnapangaha ine matnanganirang dongani a∙selo bang∙a kamna galgipa chadamberangni gisiko ka∙donganirangko komiataha ine u∙iatangaha. Unbaksana a∙jatangni manderang poraia skia aro kamna galna kragiparang donggenchimoba kam nakatgiparangna gipin a∙jarangnikosa rimnapaniko dakani a∙sel kam sandipa chadamberang uamangni suk ong∙gijaniko parakataha.
DSC ni kamrangna galgiparangko personal interview ko ong∙atgija porikka seanio mangmang pangchake seokna nanganiko ASPF dolrang mol∙molangaha. Personal interview ko ra∙gatgenchimode sakkirangko rakkina video record ka∙e ra∙rikskachina janapangan baksana kakketgipa cholon bewalo kamrangna rimnapaniko dakskachina aganangskaaha. Jemangan uamangni porikka segimin resultko chu∙ongnikjagenchimode DSC-o donggimin video recordingni sakkikoba on∙pachina didiangaha. Una agreba kakket ong∙e mikkang nitea gri kamo seokanganiko mesokna aro chadamberangni gisiko maming jajaaniko ra∙bajachina, porikkao man∙gipa markrangko aro personal interview ra∙gimin ko jinmana parakatchinaba ASPF didiangaha.
Kamna rimnapanio maming dakeba mikkang niteagri aro kakketgipa bewalo dakchina aganangan baksana a∙jatango songdongenggipa manderangna mongsongbate kamrangko tikatpachina aro dorgasto galaoni on∙gimino somoio pangchake ta∙rakale chu∙sokatchinaba ASPF dolrang DC ko mol∙molangaha.
