Gambegre bye election-o BJP dolrang namgipa bewalo dilange songadama nokadamni manderangko ra∙dona aro tangka paisa jakkalsretanirangko bon·atna kamrangko ka·anggen ine BJP-ni State Vice President Bernard Marak parakataha. Gambegre Constituency-ni ning·o bang·a kangal cholgrirangan chu·onga gita dakchakanirangko man·jaenga maina sorkarini chamatgipa tangka paisarangko dilgiparang an·tangtangna jakkalanichi manderangna maming namdapataniko dake on·a man·jaenga ine Marak aganangaha.
Ia chango Gambegre bye electiono susagrikgiparangna namen dingtanggipa ong·gen aro jemangan da·o dilenggipa sorkarini kamrangko namnikgijagipa pilakan BJP dol-nan pu∙ontokgen ine Marak aganangaha. Gambegre Constituency-ni ning·o songdongenggipa manderang mikkangchi rasong gnanggipa dilgipako re·baenggipa November 13 tariko seokna tik ka·anggen aro anga bebe uamang BJP dol-kon gipin susaenggiparangni palo seokanggen ineba Marak aganangaha.
Gambegre by-election-o BJP dol, Chief Minister-ni jikgipa, Congress ni Jingjang M Maraka aro TMC ni Sadhiarani Sangma baksa biltinggrike susaangrikani ong∙batgen. Gambegre ge∙sa tribal Constituency ong·ani gimin mikkangchi dingtangatna aro miksongatangko chu·sokatna krenge kamrangko ka·angna manchianikoba Marak parakangaha.
Unbaksana Gambegre-ko namroro silroroatna aro manderangni janggi tanganio nangchongmotgipa man∙a nanggiparang jekai chi, nok, kam man∙ani cholrang, ration card rangko BJP on·a dakchakangaha. Iasan ong∙aigija NREGA, JJM, PMGSY, IHHL, NRLM, pension, poraia skiani aro chadamberangni nanganirangko niroke kamrangko ka·anggen ineba Bernard Marak aganangaha.
