Tura songjinmani sepang jolo donggipa Ballonggre Petrichor Pre-School, William Iniative-ni dakchakanichi bi·sarangni gisepo mobile jakkalani bidingo songni nokni manderangna mikrakataniko on·a program-ko ong·atangaha. Ia program-ko songsalo bi·sarangni mobile jakkalani batroroengani gimin aro uamangni chu·gimik tang·doanio namgijagipa sinjetanirangko chagrongenggipaoni naljokatna miksonge ong·ataha.
Program-o sak 150 gisiko nanggipa manderang sokbatokaha jeon Ballonggre jolni ma·aparang, songni nokni dilgiparang, bi·sa aro chadamberang mobile jakkalanichi namgijaniko champengna skani donge bakko ra·angaha. Mobile-ko jakkale nosto ong·aniko u·iatna, school-ni skigiparang aro staff skarang kan·dikgipa golpoo dakmesokanikoba dakangaha.
Program-ko ong·atani bako Ballonggre Petrichor Pre-School-ni Director, Dr. Jino Sangma, sokbagiparangna namgipa skaniko on·e, community awareness program-ni gamchataniko aganangaha. Mobile-ko jakkalronganichi be·en bimangna, gisikni chanchianiko aro songsalo janggi tanganio namgijagipa bewalrangko ra·bana man·aniko u·iate ma·aparangko ku·cholsan ong·e ja·ku de·china mol·molangaha. Mobile-ko jakkalanichi pilak namgijagiparangni bidingo Tura Civil Hospital-ni Psychiatrist, Steve Cherak Sangma, mongsonggipa talatanirangko sokbagiparangna aganangaha.
