NGH, Resubelpara-oni ge·sa dol jean cycle salanichi be·en bimangni namgniko manderangna mikrakataniko ra·bana jotton ka·enggipa A·we Pedallers Club, changgnigipa Off-road Cycling Challenge-ko District Sports Promotion Society-ni dakchakaniko man·e ong·atangaha. Ia cycling challenge-o senior category bilsi 16-na batgiparangko aro junior category bilsi 16-ni ning·o ong·gipa chadamberangko bakgni dake susaatangaha. Senior category-ko Resubelpara mini stadium-oni Jolding wariona salatangaha aro junior category mini stadium-o salsusaangaha.
2024 bilsini 2nd Edition Off-road Cycling Challenge-o senior category-o susagiparangoni skanggipa biapko Ampati-ni Jeckison Sangma man·angaha. Gnigipako Wlliamnagar-ni Hubat Chuangsha Marak aro gittamgipako Resubelpara Bolsaldam-ni Austen Sangma man·skaaha. Junior Category-o skanggipa gadangko Resu Daram-ni Chubatsrang Sangma, apsandaken gnigipakoba Resu Daram-onin Ratcha Sangma aro Resu Nokchelparani Sushant Rabha gittamgipako man·angaha.
Ia susaaniona NGH a·jani District Sports Officer Linza Fenny Syiem mongsonggipa ong·e sokbaaha aro unbaksa Dr. Okinwa D.Shira-ba re·bae bakko ra·angpaaha. Bon·kamao A·we Peddlers club susaaniko chu·sokatna dakchakgipa District Sport Office, District Sport Association, Medical department, Police department aro gipin bak donggiparangko mittelangplaha.
