North Garo Hills-ni District Selection Committee (DSC) na LDA cum Typist aro gipin kamrangna re∙baenggipa sal somoirango mikkang nitegija kamna rimnapaniko dakchina Rongrong-ni MDC Rinaldo K. Sangma NGH-ni Deputy Commissioner ko mol∙molataha.
Uni iako aganani miksonganiara DSC-ni Vice Chairman saksa MLA ni depante ong∙ani gimin NGH-o songdongenggipa manderang mongsongbate Rongrong constituency-ni chadamberang ja∙manchi kamrangna rimpanio kakketgijagipa cholrangko jakkalangna kensoaniko janapangani gimin ong∙a. Iako aganengon, politics-nigita noktangoniko indakgipa gadangni kamrango seokanichi pilakande kakketgijagipa kamrangko ka∙rongja ine Sangma aganangaha. Indake ong∙genchimoba bang∙bata somoirangon bilrangko jakkalsretanikoba nikna man∙skaaha jean Prevention of Corruption Act-ko pe∙ani ong∙a ineba Sangma agandapangaha.
Bang∙bata changon dal∙dalgipa manderang baksa maming meligrikani ba bak dongjagenchimode, gisiko nanggipa aro man∙a kragipa chadamberang kamrangko man∙rongja ine aganangaha. Indakgipa obosta ong∙aoniko champengnagita nanggipa ja∙kurangko de∙e maming mikkang nitegija kragipa bewalo kamrangna rimnapaniko dakchina Sangma didiangaha.
