World Mental Health Day ko da∙al salo College of Community Science, Central Agricultural University (Imphal), Tura, Meghalaya-o gisiknigita bilgrigipa manderangna dakchakaniko on∙a “Mental Health at Work” katta bichingo pangchake maniangaha.
Ia tom∙aniko College of Community Science-ni Conference Hall-o ong∙atangaha jekon Department of Human Development and Family Studies-ni Assistant Professor Dr. Narmada Hidangmayum dilangaha jeon College of Community Science-ni skigiparang, kam ka∙giparang, East Garo Hills aro South Garo Hills-ni KVK (Krishi Vigyan Kendra) scientistrangba bakko ra∙angtokaha. Gisiknigita bilgriako man∙gipa manderangni neng∙nikaniko ma∙sie ra∙chakna nangani bidingo chanchiriman baksana poraia skiani aro ge∙a gamani gimin name dake am∙sandie u∙ie ra∙na nanganikoba uamang chanchiangjolaha.
Ia tom∙aniko College of Community Science-ni Dean Dr. Jyoti V. Vastrad-ni agananichi a∙bachengataha jeon ua poraiani a∙damrango aro kam ka∙gipa biaprango gisiknigita bilgrigipa manderangko mikkang nitegija namgipa bewalo ku∙cholsan ong∙e jakkalna nanganiko aganangaha.
Narayana Health, Bengaluru-ni Program Manager Nagaraja Pani mongsonggipa ong∙e sokbae gisikni gita sinjetani, kenani aro kenjagokanirang gisikna aro be∙en bimangna namgijani bidingo aganangaha. Iarangko aganengon, kam ka∙gipa biaprango namgipa bewalo ka∙na man∙agita mikron-na simsakaniko 20:20:20 rule aro be∙en bimangna simsakaniko 30:30:30 rule rango pangchake dakmesokangaha.
Tom∙anio bak ra∙gipa sakantiko, agantalate on∙giparang aro dakdilgiparangni ia program-ko chu∙sokatna man∙anina bon∙kame Dr. Narmada Hidangmayum mittelpilangskaaha. Una agreba Vice Chancellor, Dr. Anupam Mishra, Director of Extension Education, Central Agricultural University, aro College of Community Science-ni Dean Dr. Jyoti V. Vastrad ni chotchanggija dakchakanina aro dilna sapaninaba mittelangaha. Gipin biaprangoni bak ra∙na sikgipa manderangna dingtang mancha Google Meet gitaba ia tom∙anio bak ra∙na cholko on∙angaha.
