Niksamso Garo Community Organization (NGCO) dolrang Garo hills-ni Self-Help Group (SHG) dolgniko, Chief Minister’s Special Development Fund (CMSDF) oniko kam ka∙na ine tangkarangko bikote ra∙anina uamangni kosako matnangangaha. Ia SHG dolgniara, Tura Walbakgre-ni Akusa SHG aro Kebolpara Ampati-ni Chinasa SHG ong∙achim. Uamangni kragija kamna dolgni SHG-ni kosako Budbar salo SWGH-ni Deputy Commissioner na u∙iataniko NGCO dolrang parakangaha.
Aganani gitade Akhusa SHG ni Secretary, Durapara songni ramako tarina gong 9.98 lakh aro Bakdagre songni ramako tarina inenba gong 9.99 lakh tangkarangko bikotaha ine u∙iataha. Apsandaken Chinasa SHG ni Secretary-ba gong 9.99 lakh tangkako Debajani songni ramarangko tarinaa, gong 9.99 lakh ko Sanjengpara songni ramana aro gong 9.99 lakh tangkarangko Aruakgre songni ramarangko tarina tangkarangko bikotangahachim ine parakataha.
Uamang dolgnini tangkarangko bikote ra∙a chu∙gimikara gong 49.96 lakh mang ong∙achim ine u∙inagita man∙aha. Tangkarangko rama tarina ine bikotahaoba uamangni kamrangko am∙sandie niora rama tariani maming chinko nikjahachim. Ia dolgnini kosako am∙sandianiko dakna NGCO dolrang raken didianiko on∙angaha.
