Batanggimin salrango AHAM Eastern Zone-ni gitcham President Silang Goera Ch. Marak-ni ka·rimskarangko ong·katdilbae AHAM CEB, Tura-ni President George Prince Cheran Momin-ni kosako ja·pang gri kragijagipa kattarangko jakkalanina uko dolo kam ka·anioni dontongataha.
Dolo Vice President-ko songa dongjanina Eastern Zone-ni gitcham President Silang Goera Ch. Marak-ko nalis ka·na nange CEB Tura-nigita AHAM Eastern Zone-ni kam ka·aniko dongimin constitution-o pangchake dontongatna nangaha. Indakgipa neng·nikanirangko chagrongani gimin a·sel obostarangko name dake nirokatna man·kuja dipetna dikdiksa somoina Eastern Zone-na caretaker committee ko CEB Tura songangaha.
Kakketko niatgenchimode kamko wate katanggiparangara Songsak Unit-na agre Eastern Zone-ni sak 4 dilgiparangsan ong·aia jean Nengkra, Chiading aro Songkama unit-ni ong·a ine ma·sina man·aha. Uamangna agre gipin dilgiparang AHAM baksaan daitotangko done kamrangko ka·enga jean re·anggipa somoio jinma kamtangko watgope kata ingipa kattara tolasa ong·aia ine aganangaha.
Silang Goera Ch. Marak-ko nalis ka·ani chittiko September 23 tarikon uona sokatgenchimoba uni kamtangko watna chitti segipao an·tangko President ine chanangkue soi ka·angaha. Ian uni sapgijaniko, dilna changgijaniko aro u·ianio komianiko mesokanga ineba matnangataha. Indake uamangni Eastern Zone-ni Zonal Unit aro Sub-Unit oniko kam wataniko mande ra·en CEB ra·chakangaha.
CEB AHAM-ni kam ka·anirangko name rakkina dolo ong·gija kam ka·giparangni kosako nalis ka·na nangaonaba sokaha jean mikkangchi AHAM dolko nambata gadango aro rakbate kam ka·na dakchakani ong·gen ineba AHAM CEB Tura u·iatangaha.
