Garo Hills Autonomous District Council (GHADC)-ni dormarangko on·a man·jae bang·a neng·nikanirangko chagrongna nanganiko nike council-ko dingtangatna nanganiko NPP dolni digipa aro Rongara-Siju ni MLA Rakkam Sangma aganangaha.
Council-ko mangrakatpilna sakantini bakrime daito ra·e kam ka·anisa ong·enga jeon MDC-rang, kam ka·giparang aro songni nokni dilgipa Nokmarangba ku·cholsan ong·na nanganiko Sangma aganangaha. Kajina man·anirang komiengode maiba ong·gija kamrang dongnaba gnang. Meghalaya sorkari council-o kam ka·giparangna tangkarangko gamchake dakchakaha ineba Sangma aganangaha. Indake ong·genchimoba, ua kajina man·ani aro tangkarangko jakkalani bidingo janape kajina man·giminoniko kamrangnaba apsangrik jakkalaniko ja·rikna nanga ine Sangma u·iatangaha.
Sangma-ni janapanigitade, ian council-ko sawa aro badia dol nirokengani gimin ong·ja, indioba system ba chalaianiko tangkame rakkiani kattasa ong·a ine aganangaha. Sorkarini dakchakahaoba council-o tangka paisa man·anirang ba korosnigita namen neng·nikanirangko chagrongangkuenga. NPP dolni nirokna skang Congress dolrang ja 20-30 ong·pile dormaharangko on·angna man·jaha ineba Sangma agandapangaha.
Council-ko bilakdapatna 125th Constitutional Amendment-ko ra·banasienggipani bidingo Sangma sing·anina aganchakengon council-na man·gnirangko ra·bana man·ani gamchataniko talatangaha. Ma·mongnigita tangka paisarangko chamatna miksongani gnang jeon ia amendment a·bachengo donggenchimode a·sel obostarang dingtanggipasa ong·skagenchim ine Sangma parakangaha.
District Council dal·bea dingtanganiko nangchongmotenga, ong·jaode ma·mong sorkarini ka·dongani komirikrikanggen ine ua mikraksochinaba aganangaha.
