A∙chik rangni daka rikani aro jatni nanggipa kamrangna ja∙ku de∙angna gitalgipa Non-governmental organization (NGO) jean Garo Omniscience for Ethnic Revival and Awakening (GOERA) dolko Tura-o skotong done bikotangaha.
GOERA-ni kam ka∙na miksonganiara A∙chikrangni chengoni ja∙rikbaenggipa daka rikaniko ripingna, songsal aro chadamberang baksa ku∙monge nanggipa ja∙kurangko de∙na am∙sandie kam ka∙ani ong∙a ine President Thomas M. Marak u∙iatangaha.
Ia gitalgipa dol jatni daka rikanirangko doka dam∙ani, chrok mesaani, ku∙tang aro sol∙a repani bidingo workshop-rangko ong∙ate re∙mikkangna miksongenga ine parakataha. Una agreba jatni daka rikanio, cha∙bewal aro kal∙susaanio pangchakeba songsal baksa bakko ra∙angna tik ka∙angaha. Skie ra∙ani cholrangko on∙agita scholarship, vocational training, digital literacy aro me∙chikrangko ra∙doani program-rangko ong∙ate ja∙ku de∙angna miksonganikoba parakangjolaha.
A∙chikrangni itihas, aganritingbagipa golporangko aro jatni jakkalbagipa sam A∙chikrangni bidingo nambate ma∙sie ra∙na nanggipa am∙sandianiko dake see rakkina miksonganikoba uamang aganangaha. Unbaksana mikkangchi kamrangko nambate ka∙na man∙agita educational institution, NGO, sorkari aro private dolrang baksa apsan bakrime kam ka∙anggen ineba parakataha.
Garo Hills-o GOERA dolrang Nongalbibra, Rongara, Baghmara, Babadam, Tikrikkila, Selsella, Dadenggre, Rajabala, Rongmil, aro Dajegre-o regional unit-rangko a∙bachengatangaha. Apsandaken Women’s wing-ni sub unit-rangko Rongronggre, Chandagre aro Rongkurigre-o songangaha ineba President Thomas M. Marak u∙iatangaha.
