Garo Hills Autonomous District Council (GHADC)-o kam ka·giparangna jasani dormahako NGEA-ni dabiagitan Meghalaya 5th Pay Commission-o pangchake on·a ku·chakaniko Executive Committee (EC) ge·etaniko Bristibar attam, September 19 tariko parakataha.
Non Gazetted Employees Association, re·anggipa August 19 tarikoni jingjengataniko dakna a·bachengataoni jasamang ong·nasipilosa council-ko chalaienggipa EC uamangni dabianiko knachakaha. NGEA, an·tangtangni ja 34-ni dormaraharangko on·gija donchipanina aro 2018-o ra·gatgimingita 5th Pay Commission-ni ning·o dormaharangko on·china raken dabiangaha.
Re·anggipa antio NGEA-ni tom·chakenggipa biap Tura Government College kal·chakramona re·ange 4th Pay Commission-ni ning·o jagittamni dormaharangko ra·chenge nipilna nangkuenggipa kamrangko ka·na jagittamna somoirangko EC bi·angaha. CEM Albinush R Marak aro Deputy CEM Nikman Ch. Marak an·tangan NGEA-ni manderangko re·ange mol·molahaoba uamang ra·chakna jechakaha. Changni chang sinjetanirangko on·ani ja·mano da·o council-ni EC 5th Pay Commission-o pangchake jasani dormarangko NGEA-ni nangnikagitan on·a tik ka·angskaaha.
5th Pay Commission-ni ning·o jasa mangmangni dormaharangko on·genchimode je somoioba jingjengataniko dontongatna kusi ong·a ine NGEA-ni dilgipa Brithen Sangma jinmani nangnikaniko batanggimin chango parakangmanaha.
