A∙dokni government aro non-government skulrango skigipani kamko ka∙nagita Meghalaya Teachers Eligibility Test (MTET) pass ka∙giparangko nangchongmotani gimin MTET porikkako bilsiantin ong∙atchina GHADC Cotton Growers Association-ni Chairman aro MDC Aldo A. Sangma Education Minister Rakkam A. Sangma-na chitti see mol∙molangaha.
Sangma-ni chittio janapatanigitade, a∙doko bang·a skigipani kamko ka∙na sike dongenggipa poraia skia man∙giparang MTET porikkako chu∙ongagita ong∙atjani a∙selo kamrangko man∙a neng∙nikaniko chagrongenga. Apsandaken somoigita cholrangko man∙jani a∙selo an∙tangtangni skigipani kamko ka∙na gisiko sike donganiko gimaatna nangao ga∙akenga ineba Sangma janapataha.
Uandake a∙doko skigipani kamna poraia skia man∙giparangko nangan baksana skigipani kamko ka∙na gisiko sike dongenggipa batroroenganikoba Sangma janapangaha. Iani gisepon skigipani a∙bao kamko ka∙na gisiko sike dongenggiparang an∙tangtangni sikanio somoigita chu·sokgipa ong∙na aro uamangna cholko on∙a man∙agita MTET porikkako bilsiantian ong∙atchina Sangma ia cholko ra∙e Education Minister-ko mol∙molangaha. Sangma-ni ia mol·molataniko knachake Education Minister ra·chake mikkangchi bilsiantian MTET porikkako ong·atna kamrangko ka·anggen ine parakatskaaha
