Social media-rangko jakkale koborrangko parakatenggipa a·damrangko Meghalaya Communication Policy 2024-o Directorate of Information and Public Relations (DIPR) ni ning·ao segate ra·china Meghalaya sorkarini tik ka·aniko Thma U Rangli Juki (TUR) dolrang jegalataha. Uamang pilak content tarigiparang, koborrangko parakatna kam ka·enggiparang aro sakanti songdonggipa manderangkoba ia niamni kosako jegalgrimchina didiataha. Ian amikbrang dakanisan ong·a jean Indian constitution-ni Freedom of Expression aro Freedom of Speech-ni dongimin niamko pe·ani ong·a ine TUR parakataha.
Koborrangko manderangona sokatani bidingo sorkarini chubatgipa bilko man·aniara a·dokni aro manderangni kosako kragija dakani ong·a. Sorkarini ja·ku de·aniko uamang pangchakani grigipa aro manderangni jakgitelaniko doksotgipa ong·a ine TUR aganangaha. Da·o uamangni didiatenggipako parakatimgipa media-ni kosakoba dingtang kattarangchi dilsrete policy-ni kosako aganenggipa ine ong·draate sastiko on·a Meghalaya sorkari bilko man·genok ine TUR miksonganiko talataha. Apsandakgipa Broadcast Bill-ko ma·mong sorkari, press-ni aro freedom of expression-ko nigrike ra·gataniko dontongatna nangaha ineba janapataha.
Law aro policy-ni dingtanggrikaniko sorkarini ma·sikujaenganina aiao inmananiko janapate press-ko India constitution-ni ning·ao ga·akgipa aro legislation-ni bak donggipa ong·aniko TUR u·iataha. Social media-rango sorkarini namgija kamni kosako agangipa ramram manderangkoba ia niamo pangchake rim·na man·genok. Indake dakdraaniara Indian constitution-ni freedom of expression aro freedom of speech-ko pe·anisan ong·aigija Right to Information Act 2005-ni kosako re·aniba ong·a ine TUR aganangaha. Ia policy-ko a·bachengani somoio media a·damrang ku·rang on·gija jrip donganina aiao inmanikoba uamang janapatjolaha.
