Da·al salni bako West Garo Hills, Tura Don Bosco Higher Secondary School-o bilsi 14-ni ning·ao ong·gipa aro una batgipa skul bi·sarangna 5-gipa Buccieri Memorial Inter-School Basketball Tournament-ko a·bachengataha. Ian skanggipa changna ‘age category’ ba bilsini kri bak dakate ia tournament-ko ong·atchengenggipa ong·a.
Ia tournament-ko dingtang mancha saksa Garo Hills-o bimchipe kam ka·e on·anggipa aro Don Bosco School Tura-ko a·bachengdilgipa Don Bosco Salesians-ni Italian Missionary, Father Anthony Buccieri-ko gisik ra·e bilsi antian ong·atrongenga. 2024 bilsini chang 6-gipa Buccieri Memorial Inter-School Basketball Tournament-ko September 10-oni 14 tarikona semi-final gadangona matchotate final-ko September 17 tariko ong·atskagen.
Bilsi 14-ni ning·o me·asarangni gisepo ge 6 aro me·chikrangoni ge 3 skulrang bakko ra·enga. Apsandaken, bilsi 14-na batgipao me·asarang dol 9 aro me·chikrangni gisepo dol 5 bakko ra·e susaangskagen. Ia susaanio West garo Hills a·ja mangmangnisan ong·aigija dingtang dingtang a·jarangoni skulrangba bakko ra·angenga.
Tournament-ni skanggipa salo, me·chikrangni U-14 category-o Don Bosco Higher Secondary School Tura aro Christian Girls Higher Secondary School Tura susaangaha. Uamangni gisepo kal·anio Christian Girls Higher Secondary School Tura 6-1 basket-chi Tura Don Bosco School-ko amataha. Gnigipa bako, me·asarangni U-14 category-o, Bosco Mount, Rongkhon 40-0 basket-rangchi altuabee Auxillium Hr. Sec. School Tura-ko amatchepataha.
Da·alo chu·gimik ge 3 mang kal·aniko ge 6 skulrangni gisepo susaataha jeon bon·kamgipa kal·aniko me·asarangni bilsi 14-na batgipa category-o Montfort Centre Tura 39-14 basket-rangko man·e Don Bosco Hr. Sec. School, Tura-B ni kosako chegipa ong·angaha.
