Inter-constituency football tournament-ko mikkang bilsio a∙dok sorkarini ong∙atna miksongenganiko Chief Minister Conrad Sangma Sukrobar salo parakangaha. Ia tournament-ko mikkang bilsio Meghalaya Games matchotani ja∙mano ong∙atgen jeon a∙dokni ge 60 constituency-ni dolrang bakko ra∙ange susagrikanggen ine u∙iatangaha. Ian football kal∙anio sapgipa chadamberangko ma∙sina aro mikkangchi uamangko seoke nambatgipa gadango kal∙angna cholko ra∙baani ong∙gen.
A∙doko sports-ni a∙bako namdapatna aro kal∙susagiparang a∙doktangna mikkim rasongko ra∙bana man∙agita, a∙dok sorkari re∙anggipa bilsirango sports-na nanggipa rika cho∙anirangko a∙bachengatna tangka paisarangko bang∙en chamataha ine Chief Minister, Moldova-o ong∙atgipa World Arm Wrestling Championship-o chebagiparangko mande ra∙pilaniko dakani somoi-o janapangaha. Una agreba dingtang dingtang sports association-rangko dakchaknagita aro sports-ni a·bako namdapatna tangka paisarangko on∙ange dakchakanikoba dakenga ine Sangma agandapangaha.
