SWGH, Mahendraganj constituency-ni gnigipa MLA Cup 2024-ko mijal saloni Boldamgre kal·chakram bakrao a·bachengataha. Kal·aniko oprakani somoio Mahendraganj-ni MLA aro Meghalaya sorkarini Advisor Sanjay Sangma, Bajengdoba-ni MLA aro State Level Public Grievances-ni Chairman Pongseng Marak, mongsonggipa ong·e sokbaaha.
Ia MLA Cup 2024-o a·jani aro wilwilao donggipa songrangoni chu·gimik dol 31 mang bakko ra·e susaanggen jekon Rangdokram SCYC, Boldamgre ong·atangenga.
MLA Cup 2024-ni skanggipa susaaniko mijal salo Garagre FC aro Domapara FC-ni gisepo kal·angaha. Ia kal·anio biltinggrik ong·e susaangaha jeon dolgnian goal prak-ko chipe tie breaker ong·aona soke Domapara FC 4-3 chi Garagre FC-ko amate chegipa ong·aha. Ia susaani re·baenggipa salrango ong·angkugen jeon songsa songgipin ia MLA Cup-ko chena kal·susaaniko nikangna man·gen.
