Re·anggipa August 25 tariko Ri-Bhoi a·jani Niangbymai, Umran Fuels Petrol Pump-niko dacoit dakgipa sak 4 manderangko rim·aha ine Ri-Bhoi ni Superintendent of Police Jagpal Singh Dhanoa parakataha.
Ia ra·seke ra·gipa manderang petrol pump-ni manager aro uno kam ka·giparangko chadrape tangka gong lakh 4,24,614 tangkarang baksana mobile phone ge 3 ko ra·seke ra·angaha. Indake September 1 tariko ia obostao jak donggipa manderangko Nagaland-ni Dimapur a·jaoniko rim·na man·e sing·sandianirangko dakon ia obostao jak donganiko ku·rachakangha ine u·iatangaha.
Rim·a man·giparangara Nagaland, Dimapur-ni Bokavi Zhimomi (25), Pashen Lam ( 32) aro Rokongulie Keppu (18) ong·a. Brigipa rim·a man·gipa mandeko Tuensang District Police rakkie donaniko dakenggipako Ri-Bhoi District Police dolrang ta·raken rimbae Court-ona bichal ka·na ra·anggen ineba aganangaha. Dacoit dakgipa dolrangni jakkalgipa Bolero gari Registration number NL-07CB 0156-ko police dolrang rakkie donenga ineba SP Dhanoa u·iatangaha.
