Garo Hills-o nosto ong·enggipa L.P skulrangko namdapatna taridapani kamrangko matchotatani bidingo 42-Rongjeng-ni MLA Jim Sangma da·al salo Education Minister Rakkam Sangma-ko sing·doangaha. Rongjeng constituency-ni ning·o ge 59 skulrangko taritaina tik ka·aoni ge 19 skulrangkosan matchotkuenga ine Jim Sangma aganangaha. Ia namgipa kamrangko bilsi 20-30 ni ja·manosa man·enga ineba ua janapangjolaha.
Sing·anina aganchakengon, Education Minister Rakkam Sangma, ia project-rangko matchotatna dingtangmancha somoirangko dona dongjaoba re·baenggipa salrango ta·rakkale matchotatna jotton ka·gen ine Sangma parakangaha.
Iani gisepon Jim Sangma, kamrangko ka·ani namen ka·sinbeani gimin ta·rakkale matchotatna mol·molangaha. Uni constituency-o bang·a manderangan skulko taridapanio namgijagipa bosturangko jakkalanina aro ru·utbee somoirangko ra·enganina janapanirangko man·enga ine Sangma aganangaha. Una agreba Sangma, ia project-rangko ka·na Education department jako ra·gija Meghalaya Infrastructural Development & Financial Corporation Ltd. (MID & FCL)-na on·aninaba sing·doangaha.
Ian dal·begipa project ong·a aro Mission Education-ni ning·o bang·a gadango kamrangko ka·enga ine Education Minister aganchakangaha. Indake ong·genchimoba ia kamrangko ka·na aro bimang ong·atna, dal·begipa project ong·ani gimin Education department-na neng·nikanirang bang·a jeni a·selo MID & FCL-ba bak dake kam ka·paenga ine Education Minister agandapangaha.
