South West Garo Hills, Ampati-o da·al salni bako District School Education Office-nigita Ampati-ni Multi Facility Centre-o District Level Students’ Science Seminar-ko ong·ataha. Ia seminar ko “Artificial Intelligence: Potential and Concerns” ba chasong gitalni technology-ko jakkalani bidingo katta bichongko done ong·atangaha.
Ia seminar-o a·jani dam 10 school-rangni chatro chatrirang bakko ra·e artificial intelligence (AI) ni a·bao an·tangtangni u·i ma·sianigita mesokangtokaha. Ia seminar-ko ong·atanichi chatro chatrirangna Artificial Intelligence (AI)-ni a·bao mikkangchi pilak dakna nangnigipa kamrangni bidingo u·ie ma·sie ra·nagitaba cholko on·angaha.
Ia Science Seminar-ko ong·atanio skanggipa gadang-ko St. Claret Higher Secondary School, Ampati-ni Class IX-ni Sechia D. Sangma man·aha. Gnigipao Good Shepherd Secondary School, Chapahati-ni Class X-ni Jackeus K. Sangma man·angaha aro gittamgipako St. Dominic Savio Higher Secondary School, Garobadha-ni Class IX-ni Kasamea M. Sangma man·angskaaha. Ia sak gittam seminar-ni topic-ko name dake u·i ma·sie ra·rikan baksana nambate dake mesokangahani gimin chu·sokgiparang ong·aha.
West Garo Hills-ni Jt. Director of School Education & Literacy-ni SEO T. Ch. Marak, Rerapara Block-ni Block Mission Coordinator S. W. Momin aro South West Garo Hills, Betasing Block-ni Block Mission Coordinator Senora N. Sangma ia seminar-o bakko ra·e mikkim dongatan baksana chegiparangna boksisrangkoba sualangaha. Ia Science Seminar-o skanggipa gadango man·gipa Sechia D. Sangma-ko mikkang jani September 27 tariko Shillong-o State Level Students’ Science Seminar ong·atnasienggipao South West Garo Hills a·jani palo bakko ra·na cholko on·angnagitaba tik ka·angaha.
