South Garo Hills Baghmara-o dontonggija mikka waani a∙selo salantio skulrangchi re·ruraenggipa chatro chatrirangna neng·nikani aro kenchakani dongani gimin songdongenggipa manderangni palo saksa social activist Greneth M. Sangma, a∙jani pilak skulrangko chipatchina Sub-Divisional School Education Officer (SDSEO)-na chittiko see mol∙molangaha.
A∙jani pilak skulrangko chipatchina mol·molataniara, dontonggija mikka wae a∙arang be·wakanichi aro ramarango bijolini silitingrang ga∙ake dongenganichi salantio skulchi re∙ruraenggipa bi∙sarangna neng·nikaniko on∙an baksana agansona man∙gijagipa a∙sel obostaoniko naljoke rakkina man∙agita ong∙a ine Sangma janapataha. Iani gisepon mikkachirang namkujana kingking skulrangko chipatchina aro ia pilak obostarangko niroke kamko ka∙china District Management Officer-koba mol∙molangaha.
