Gambegre constituency-ni changgitam MLA ong·anggipa Saleng Sangma-ni MP-na seokako man·e kamtangko watanganina bye election-ko ong·atna Meghalaya Election Department tarisamsoanirangko dakna a·bachengatangengaha. Indake ong·engon ia election-ko ia bilsini December jani 4 tarikna skang ong·atna nangao ga·akenga ine u·iatangaha.
Kobor ra·timgiparangna parakatengon, election-na tarisamsoanirangko Election Commission of India-ni dongimin niamrango pangchake kamrangko ka·angenga ine Chief Electoral Officer Dr. BDR Tiwari u·iatangaha.
Iako aganengon, adita a·dokrangni election department baksa da·al salo video conference-gita Election Commission tom·aniko dake chanchirimangaha ine Dr. Tiwari parakangaha. Una agreba Election Commission-ni ge·etanio pangchake 2025-ni electoral roll-ni bidingo dingtangmancha nipiltaianikoba dakangaha ineba parakangaha.
