South West Garo Hills Ampati ni District Chess Association aro District Administration baksa bakrime Ampati Degree College-o salgnina Inter School Chess Tournament ko ong·atanga. Ia tounament ko August 16 oni 17 tariko ong·atanga jeon South West Garo Hills aro Tura ni skul rangoni sak 44 chess kal·giparang bakko ra·angtokaha.Skanggipa salo SDSEO Emphul Marak mongsonggipa sokgipa ong·e re·baaha aro bon·kamgipa salo Boldamgre ni MDC Stevie Marak-ni jakchi chegiparangna boksisrangko on·angaha.
Ia tournament-o ge·gittam category jean bilsi 10, bilsi 12 aro bilsi 16 ni ning·o ong·gipa bi·sarangko dingtang dingtang bako donataha. Indake kal·atanichi a·doko chess kal·na sapbegipa bi·sarangko nambatatna cholko ra·baani ong·a.Open category-o, Casarina Public School Tura ni Gapesa Ch. Marak point 6 ko man·e champion ong·angaha. Bilsi 16 ni ning·o kal·giparangoni St. Claret Higher Secondary School Ampati ni Chongkimbea M Sangma 5.5 point ko man·e chegipa ong·aha, gnigipa gadangko Boldamgre School ni Yunkeycheah Ch. Marak man·angaha aro gittamgipa gadangko Don Bosco Higher Secondary School Tura ni Jakgitelat Ch. Momin man·angskaaha.
Bilsi 12 ni ning·o kal·susaanio Casarina Public School Tura ni Baiyangsrang Sangma point 6 ko man·e chegipa ong·aha, gnigipa gadangko Sherwood School Tura ni Adora K Marak man·aha aro gittamgipa gadangko St. Mary’s School Ghatgre ni Abrin M Sangma man·angskaaha. Bilsi 10 ni ning·o kal·giparangoni Soter School Tura ni Aesara Ringmitelachi Ch. Momin point 5 ko man·e chegipa ong·aha, gnigipa gadangko Casarina Public School ni Takimra Sangma man·angaha aro gittamgipa gadangko Sun Town English School ni Ansame Marak man·angskaaha.
Ia tournament-ko nambee chu·sokatna man·aha jean jolni chadamberangni chess kal·anio sapaniko mesokan baksana saksa sakgipin baksa susaagrikanio nambatanikoba nikna man·angaha.
