Meghalaya a·dokni gitcham Chief Minister, Salseng C Marak-ni rangittik a·gilsakko wate re·anganina mande ra·ani chingita, pilak sorkari office-rangko August 16 tarikoni a·bachenge salgittamna joljol kal·imaniko dakchina ge·etangaha. Ia salrango uamangko India-ni National Flag-ko donrong bewalgita songdoe donangkuchina aro office-ni maming kamrangkoba ka·jachina u·iatangaha.
Salseng Marak, 1947 bilsio atchigipa ong·a. Ua uni chu·gipa gadango poraianiko Kolkata-ni Scottish Church College-o nape matchotaha. Marak-ko, dilna sapanina aro namgipa gun-nasan ong∙aigija rongtalgipa politics-ko rakkironganinaba namen mingsingbea. Ua Meghalaya a∙dokni 6 gipa Chief Minister ong∙e 1993 bilsioni 1998 bilsiona kamko ka∙angaha jeon ua North Garo Hills Resubelpara constituency-ni MLA ong∙angaha.
Marak-ko re∙anggipa sal somoirangonin be·ennigita bilgrianiko man·e saani gimin August 8 tariko Tura Holy Cross Hospital-ona sanna bannaniko dakna rimbaaha. Saanirang namjabatroroani a·selo uko August 12 tariko Tura Civil Hospital-ona nambata sannaniko dakna rimangskaaha jeon bon∙kame ua bilsi 82-o jringjotna janggi galchotaha.
