Skanggipa changna South Western Motocross Championship 2024-ko SWGH a·jani Upper Kalaichar-o Rangira Motors Adventure Club (RMAC) salgittamna ong·atangaha. Ia su·saanio sak 64 mang manderang dingtang dingtang bakrangoni re·bae an·tangtangni changa sapaniko dakmesokangaha.
Bon·kamgipa salo Mahendraganj-ni MLA Sanjay Sangma aro Kalaichar-ni Nokma Linda Marak mongsonggipa ong·e ia susaaniona sokbaaha.
Ia South Western Motocross Championship 2024-o dingtang dingtang category ba bakrango susaatangaha jekai Local Class Final category, Scooty Class category, Beginner, Novice, 2 Stroke, Expert aro Open category-rango ong·atangaha.
Local Class Final-ni bako Kanam G. Sangma skanggipa gadango cheaha. Apsan dake gnigipako Dechangra D. Sangma aro gittamgipako Rikman Ch. Marak cheangskaaha. Scooty Class susaani bako skanggipako Bregie Riprang R. Marak, gnigipako Jayden Nongkhlaw aro gittamgipako Bikki K. Marak man·angaha.
Beginner category-o Rakkim Ch. Marak skanggipako che·aha, gnigipa gadangko Elekier A Sangma aro gittamgipako Niangsal G. Momin cheangskaaha. Novice category-o skanggipa biapko Chengseng Ch. Marak, gnigipako Shaun Lalremruata Changte aro gittam biapko Balkim A. Sangma man·angskaaha.
Una agreba 2 Stroke category-o susaanio Patsha Kharkongor skanggipa, Tenzi I. Sangma gnigipa aro Banjob Umbah gittamgipa ong·angaha. Expert category-o skanggipa gadango Banteilang Jyrwa, gnigipako Evander M. Sangma aro gittamgipako Reneky Nongtdu chenagita man·aha. Bon·kame open category-o Banteilang Jyrwa cheangaha.
