Meghalaya aro Bangladesh sima ari jolo Garo Hills-ni adita biapranggita maming lekka pancha nanggija niamni a·palo nengrabee re·grik dogrikna man·gipa biaprangko mitam video-rango niksona man·e iani bidingo sima ari jolo nambate nirok simsakaniko dakchinagita ACHIK dolrang CM Conrad Sangma-na chitti see u·iatangaha.
Uamangni chittio janapatanigitade, Bangladesh a·songo so·sojengjeng ong·e Bangladesh-ni manderang Meghalaya a·dokona napdrabenga ine u·inagita man·a. Iani gisepon YouTube channel jekai ‘DH Travelling info’ aro ‘Tahsan Rakib vlog’ rango maikai Bangladesh-oni India a·songona nengrabee napnagita man·ani bidingo video-rangko mesokataniara India a·songni sima ari jolo naljoke rakkina simsak nirokenganiko kal·stekani ong·a ine ACHIK dolrang janapangaha.
Indake sima ario nambate nirok simsakanirang dongjani a·selo niamni a·palo bang·a kamrangko ka·nagita cholko man·enga jeon manderangni naljokaninasan ong·aigija a·songna aro a·dokna mikkangchi kenbegniko ra·baani ong·a. Apsan daken da·o Bangladesh-o ong·enggipa obostarangko niate Garo Hills-ona napbanaba namen kenchaksobeani ong·enganina bakan Garo Hills aro Bangladesh-ni sima arirango bilakbate nirok simsakaniko daksochina ACHIK dolrang CM-ko didiangaha.
ACHIK dolrangni sima ari jolo da·o ta·rake kamrangko ka·china didiataniara skanggipao Bangladesh aro Garo Hills-ni gimik sima ari jolrangko nirokenggipa sipairangko bariatchina aro nanggipa technology-ko jekai night vision, GPS system, drone, CCTV camera aro saksa sakgipin baksa agan-golpogrikani bosturangko jakkale nambate nirok simsakaniko dakatchina didiangaha. Unbaksana jolo songdongenggipa manderang baksa bakrime aro uamangna ka·donganiko on·e je a·sel obostako ba napdrabaenggiparangni bidingo u·ianirang dongode nirokenggipa sipairangna u·iate champengsona man·agita kamrangko ka·angchinaba didiangaha.
Apsandaken indake India-Bangladesh-ni sima ari jolo nengrabee re·grik dogrikanirangni bidingo Bangladesh-ni sima ario nirokenggiparang baksaba u·i ma·sichakgrike nanggipa agan-golpogrikanirangko dake damgni a·songrangni gisepo nambate nirokna man·agita bakrime kamrangko ka·chinaba a·dok sorkariko didiataha. Una agreba indakgipa a·sel obostarangko mikkangchi chagrongna nangani somoirango sima arirangona sipai kotokrangko ta·rake sokatna man·agita rama jal·angrangko name tarie on·chinaba ACHIK dolrang CM-ko didiangan baksana mol·molangaha.
