Politics-ni a·bao dangdike on·enggipa manderang a·dokni college aro institution-rangni Governing Body (GB)-o bak ong·e kam ka·enggiparangko ra·galchina Garoland State Movement Committee (GSMC) dolrang NEHU Shillong, College Development Council-ni Director-na chitti see didiangaha.
Poraia skiani a·bako namdapatna college aro institution-rangni nangnikanirangni bidingo Assembly-o ku·rang on·a dilgiparangko seokaha. Indake ong·genchimoba college-rangni GB-o politics-o dangdike on·enggiparangko Chairman ba dingtang gadangrango bak ong·na on·aniara adita nanggipa kamrango nanggrikani, u·i ma·sisretani aro bilrangko jakkalsretaniona sokronga ine GSMC CEC H.Q Tura-ni Education Secretary Brimseng S. Marak janapataha. Unbaksana Assembly-ni member-rangna minggni kamrangko jako ra·na on·aniara college-rangni nangnikani aro neng·nikanirangko nirokanio nambate dangdike on·a chu·sokgijanionaba sokata ine Marak aganaha.
Assembly-ni member-rangni mongsonggipa ka·na nanggipa kamara college ba institution-rangni neng·nikani bidingo darangkoba mikkang nitegija legislative assembly-o ku·rang on·ani ong·a. Iani gisepon assembly-ni member-ko GB-o bak ong·ataniara bidako pakwate on·enggipa non-government college ba institution-rango neng·nikanirangko nichanggale kam ka·agita ong·a ineba Marak agandapangaha.
Indakgipa obostarangko chagrongenganina a·dokni dingtang dingtang college ba institution-rangni GB-o assembly member-rangni bak ong·aoniko ra·galchina didiangaha jedakode assembly member-rang poraia skiani a·bako namdapatna legislative assembly-o nambate ku·rang on·angnagita man·gen ine Marak janapataha. Una agreba politics-o dangdike on·enggiparangko college-rango bak ong·ataniko bakan dontongatchina daito donggipa education department-ko ge·etangchina Marak didiangaha.
Apsandaken college-ni Principal-sa chu·gimik nirokaniko dakengani gimin college-ni GB-o Principal-ko Principal cum Secretary dona nangchongmotaniko pilak college-on ra·gatna nanga ineba GSMC-ni Education Secretary Brimseng S. Marak NEHU Shillong, College Development Council-ni Director-ko mol·molataha.
