WGH Garobadha Misikona songni bilsi chu·ongkujagipa me·chik bi·sani kosako kragija kamrangko ka·anina jolni nangrimgimin NGO dolrang Garobadha Police station-na chitti see u·iatangaha. Ia a·sel ong·anio dosi donggipa mandeara Garobadha bazaar-o dokan dakenggipa Bapba Ghosh ong·a ine ma·sinagita man·angaha.
Ia a·sel obostani bidingo pulis dolni officer in-charge baksa golporimani ja·mano, Bapba uni kam ka·na rakkigipako mandeko dokano done kate chakengaha ine u·inagita man·angaha. Iani bidingo me·chik bi·sani ma·a paarang dosiko dakgipa mandeni kosako mokordomako ka·angan baksana me·chik bi·sako medical test ra·na Tura-ona watataha ine parakataha.
Indake ong·engani gisepon dosi donggipa mandeko ta·rake rim·china didiangan baksana me·chik bi·sana aro uni nokdangna dakchakaniko on·e name am·sandianiko dake kakket bichalona ra·bae on·china NGO dolrang pulis dolrangko didiangaha. Una agreba bakrimgimin NGO dolrang dokanona re·ange sing·sandianirangko dake dokanko chipe donangaha.
