North Garo Hills-ni skotong Resubelpara jolni adita biaprango ramarang namjabeahanina, songdongenggipa manderang re·a doanio neng·nikaniko man·enga aro a·sel obostarangko chagrongna kenchakaniba ong·enga ine saksa social activist Cherian Momin, Chief Minister Conrad Sangma-na chitti see u·iatangaha.
Uni chittio janapatanigitade, Resubelpara-ni mongsonggipa office-rangona re·na jakkalgipa chong·motan DC Office, DRDA Office, Municipal Office aro PWD Office-rang baksana DC office sepango donggipa Rome Rabha, Jonglapara songona re·gipa rama aro Dekatchang-oni DC office-ona re·gipa ramarang namen namjabeaha ine Momin janapataha. Ia ramarang namjabeaniara ru·uta somoirangna galchipani aro nirok simsakani dongsrangjani gimin ramao dal·dalbee a·kilokrang ong·katani a·selo salantio re·ruraanio namen neng·nikanirangko on·enga. Iani bidingo songdongenggipa manderangni changni chang u·iatgenchimoba aro mol·molanirangko dakahaoba, ia ramarangni gamchataniko knachake taridape on·kujaenga ine Momin u·iatangaha.
Ia ramarangko salantio jakkalanio mongsongbate skul bi·sarang wachi kario a·bildek chibildekrarako re·na nangenga jeon a·sel ong·na kenchakanisan ong·aigija jolni MLA-ni uni manderangna simsakgijaniko mesokani ong·a. Indake ia nangchongmotgipa ramarangni namgijaniara NGH-ni skotong songjinmana a·dok sorkarini rama jal·angrangko tarie on·anio chu·sokgijani ong·a ineba Momin janapangaha.
Resubelpara songjinmani mongsonggipa ramarang namjaenganiara administration-ni nirok simsakgija galchipe donanichi aro ru·uta somoirangna name taridape on·jani a·sel ong·aha. Ia ramarangko politics-nigita man·gipa contractor-rang bilsiantio chonchongipa taridapanirangko dakna chamgipa AR aro SR scheme-rangchi a·a gitchakrangko dape tariaha jeon wachi kario mikkachirang dapgimin a·arangko man·pakange ramako batesa namjabataona sokatronga ine Momin u·iatangaha.
Kosako janapgimin ramarangni namgijanichi salantio office-ona re·rurae kam ka·enggiparangna, skul bi·sarangna aro jolo bading chiwale cha·enggiparangna neng·nikaniko on·an baksana songdongenggipa manderangni neng·nikaniko sorkarini nirok simsakgija galchipaniko mesokani ong·a ine Momin janapangaha.Ia chagrongenggipa obostarangko nirokate Resubelpara-o namgija dongenggipa nangchongmotgipa ramarangko name aro ta·rake tarie on·chinagita social activist Cherian Momin, CM Conrad Sangma-ko mol·molangaha.
