South West Garo Hills, Ampati-o pilak sipai kotokni a·bao dangdike on·enggiparangna aro kamoni neng·take dongenggipa sipai kotokrangna uamangni pilak nangani aro neng·nikani somoiorango dakchakaniko on·a man·agita Military Helpline number +919436763819 ko a·bachengataniko a·jani Deputy Commissioner Hema Nayak parakataha.
Ia helpline-ko a·bachengate on·aniara sipai kotokrangna aro uamangni nokdangni manderangna pilak an·tangtangni neng·nikanirangko agan-golpogrike ma·sie ra·e uamangna nanga dakchakaniko on·a aro uamangna nangchongmotgipa u·iatanirangko on·e dakchakna miksongani ong·a ine DC aganangaha.
Ia helpline-ko a·bachengate on·anichi a·jao dangdike on·enggipa sipai kotokrangna dingtang dingtang obostarangko chagronggenchimoba aro pilak neng·nikarangniko man·anio dakchake on·a namgipa chol ong·a ineba DC aganangaha. Ian South West Garo Hills administration-nigita sipai kotokrangni a·bao dangdike on·enggiparangna dakchake on·agita ja·ku de·ani ong·a ine DC Hema Nayak agandapangaha.
