Batanggimin May 6, 2024 tariko Sonja Wildlife rescue Centre-o donenggipa Hurorangko Ri-Bhoi Umtrew-o gital rikenggipa Meghalaya State Zoo aro a·songni gipin zoo-rangona a·dok sorkarini apjitatna parakataniko ma·sinagita man·angaha. Iani gisepon Garo Hills-ni bang·a NGO dolrang aro songdongenggipa manderang Hurorangko apjitatjachina raken jegalanina, a·dok sorkari a·songo dongimin CZA-ni niamo pangchake Sonja Wildlife Rescue Centre-o Hurorangko donnagita kragipa ong·ja ine talatangskaaha.
Indake bang·a jegalanirangko man·e, July jani skanggipa antio adita koborrangko parakattimgiparango sorkari Garo Hills-ni Hurorangko gipin biapona apjitatna maming tik ka·ani dongkuja ine aganchakaniko nikna man∙genchimoba iako dontongatna sorkarinigita Secretary to the Government of Meghalaya aro Forest and Environment Department-na sea jotachi ge·etani dongkuja ine Garo Hills-ni adita NGO dolrang janapangaha. Iani kosakon Sonja Wildlife Rescue Centre-o Hurorangko donna kragipa ong·jagenchimode Garo Hills-ni dingtang biapo Mini zoo ba Breeding Centre-ko tarie apjitatchina CM Conrad Sangma-ko didiangan baksana Hurorangko gipin biapona apjitatna tik ka·giminko ra·galpilchina mol·molangaha.
Minggipinara Garo Hills-o nikronggipa jatgni Guangrangko saksa Wildlife biologist Gautam Kadam-ni Betasing block-ni ning·o ong·gipa Baladinggre-o aro SGH-ni Imilchang Dare-osan donga ine chanchie gitchakgipa Guang jekon A·chikkuchi “Guang Sarang” minggipako “Steriphopus Wangala” ine minganiko aro jatgipin Guang jekon A·chikkuchi “Guang Gotek, Guang Nenggra, Guang A·nengra ba Guang Ronggol” ine minggipako “Habrocestum Togansangmai” ine mingjitanina NGO dolrang raken jegalataha. Uni indake A·chikrangni Challang matgrik Togan Nengminja aro jatni mingsa mingsinggipa dakbewalo manigipa Wangala-ni bimingko jakkale Guangrangna bimung donaniara A·chik jatko onia ka·anigita ong·a ine iani bidingo A·chikrangni dongimin bimungona mingjitatpilchina CM-ko didiangaha.
Una agreba bon·kame, Purakhasia-oni Baghmara re·gipa rama aro India-Bangladesh sima ari jolrango bang·a changrangon songdongenggipa manderangko Mongmarangni chadrapanichi a·sel ong·e gamjinrangko aro janggirangko gimaataniko niknagita man·enga. India-Bangladesh sima ari jolosan ong·aigija Garo Hills-ni dingtang dingtang biaprango Mongma aro Mandeni nanggrike a·sel ong·anirangkoba niknagita man·enganina, sorkari nanggipa ja·kurangko de·e manderangni janggirangko, gamjinrangko naljokatna kamrangko ka·an baksana a·selo ga·ake janggiko gimaatgipani nokdangrangna tangka paisanigita on·pilskaanirangko dakchinaba a·dokni CM Conrad Sangma-ko Garo Hills-ni adita NGO dolrang mol·molangaha.
