Ma∙mong sorkarini mijal salo budget session-o dingtangmancha kam bikotna aro dingtang dingtang a·barango changa sapaniko namdapatna miksonge tangka paisarangko chamatanina Finance Minister Nirmala Sitharaman-ko Meghalaya sorkari mittelpilskaaniko on∙angaha. Ia budget-ko ra∙baaniara a∙dok sorkarini Meghalaya Mission 10 ko ra∙gatgipa baksa ming 9 a∙damrango melia jean a∙dokko namdapatna bilongen dakchakanggen ine Finance (Budget) ni Joint Secretary aganangaha.
Ia ming 9 a∙damrangara ge∙a gamanio bite man∙aniko bariatna, kamo rakkiani aro changa sapani, bosturangko tarie nakatatani, human resources development aro social justice, songjinmarangko namroro silroroatani, energy security, rika cho∙ani, innovation, research and development aro gital chasongna niamko namdapatani bidingo pangchake kamrangko ka∙anggen.
A∙dokrangna dingtangmancha mongsonggipa dakchakaniko Capital investment-nigita loan gong 1.3 lakh crore-oni 1.5 lakh crore-ona ra∙giparangna bilsi 50 na maming interest gamgija ra∙na on∙anian rika cho∙ani aro dingtang dingtang gadangni kamrangko ta∙rakatna aro namdapatna Meghalaya-na dakchakani ong∙gen ine a∙dok sorkari janapataha. 2023-24 bilsio ia scheme-ni ning∙o crore 1,300 na baten jakkalangna man∙aha ine Finance-ni Joint Secretary aganangaha.
Credit guarantee scheme-ko ra∙doatanichi gisiko nanggipa aro dambegipa entrepreneur-rangna cholko on∙angan baksana Micro Small & Medium Enterprise (MSME) rang 100 crore-ona kingking tangka paisarangko man∙a amgen jekon Meghalaya Industrial and Investment Promotion Policy, 2024 chu∙sokatna dakchakanggen. Una agreba dam 100 songjinmarango Industrial Park-rangko ra∙bana miksongengon, Meghalaya-ba ia cholko ra∙e a∙doko chugipa gadangni Industrial Park-ko tarina man∙anggen.
A∙dokni pilak scheme-rangko Pradhan Mantri Janjatiya Unnat Gram Abhiyan scheme-nigita nambate aro bang∙bate man∙a dakchakanggen jekon a∙dokni gimik songrangan ia scheme-rangko man∙a amgen. North East a∙jarango Indian Post aro Bank rang dam 100 branch rangko kulie on∙a miksonganiba Meghalaya a∙dokna adita gital branch-rangko man∙dapna kamrangko ka∙anggen ineba a∙dok sorkari aganangaha.
Unbaksana ge∙a gamanio maming samrangko jakkalgija ge∙aniko ja∙rikna nanganiko ge∙etanian Meghalaya a∙dokna namen dakchakani ong∙an baksana namgipa bitchil aro ge∙ani bosturangko game cha∙giparangna ra∙bae uamangni kamaiani cholkoba tang∙doatgen ineba Finance-ni Joint Secretary agandapangaha.
