SWGH Rerapara block-ni ning·o ong·gipa Mellim songo Beekeepers Society-rangna, Apiculture Multi Facility Centre-ko rike on·a mijal sal July 23 tariko Chief Minister Conrad Sangma pangchakani ro·ongko songe on·angaha. Ia program-ko a·jani District Commerce and Industries Centre (DCIC) aro Meghalaya Basin Management Agency (MBMA) bakrime ong·atangaha.
Batanggimin July 6, 2024 tariko Mellim Beekeepers Society dolrang Multi Facility Centre-ko ra∙bae on∙china Chief Minister-o janapangahanina knachake, CM-ni Mellim songchi nanggipa kamna re·angani somoio joljol pangchakani ro·ongko songe on·e ia jani gisepon rika cho·ani kamrangna nanggipa tangka paisarangko chamatgen ine tangka paisarangko chamatani chittiko society-ni Executive member-rangna pakwatangaha. Ia Multi Facility Centre-ko matchotatna chu·gimik 1.52 crore mang nanggen jeon napanggipa rama, Multi Facility building, kolrang, jakkalna nanggipa bosturang, bijoli, processing unit ba uandake dingtang dingtang nanganirang gnang. Unbaksana chamatgiminoni skanggipa installment-ni 50% tangkarangkoba society-na on·angjolaha. Ia Mellim Beekeepers Society-ko a·jani DCIC 2015 bilsioni nanggipa skianirangko on·e jakkandilenga aro uamangni bija bitchioni tarigimin bosturangko badingna dingtang dingtang gadangrango cholko on·enga.
Chief Minister Conrad Sangma ia project-ni gamchataniko aganengon, ian man·gnirangko bariatan baksana jolo songdongenggipa manderangna janggi tanganio baikamgipa dake cha·ani chol ong·gen ine aganangaha. Indake chu·sokgipa project-rangko ra·bana man·agita manderangni sorkari baksa bakrimaniko nanga ine aganangan baksana bajar antio me·gimurangko nangnikanirang batroroenganina ge·china jolni manderangko didiangaha. Unbaksana batanggimin somoio Floriculture Mission-ko a·bachengatani bidingo janapangenba gisiko nanggiparangko dorgastoko gale bakko ra·chinaba didiangjolaha. Una agreba bijako jile bitchirangkosan jakkalaigija bija bitchiko rakkigipa biringkap-oniko dingtang dingtang bosturangko tarina man∙anirangkoba janapangan baksana ia Multi Facility centre-ko chu·sokatna manderangni jotton ka·e kamrangko ka·aniosa pangchakgen ine aganangaha.
Ia project-ko ra·baanichi a·jao mikkangchi namgipa ja·ku de·anirangko nikangna ka·dongsoenga jeon bija bitchioniko dingtang dingtang bosturangko tarie songsalko tang·doatna dakchakanggen ine a·jani DC Hema Nayak aganangaha. Bon·kame Mellim Beekeepers Society-rangba CM-ni jakkandilaniko aro jolo bija jilanirangko tangchaatpilna dakachaknina mittelpilani kattarangko aganangaha.
Apsan daken a·jani Horticulture Officer L.Q. Diengdoh-ba program-o dongpae centre-ko ra·bae on·ani aro gamchatani bidingo adita aganangaha. Ia program-o Education Minister Rakkam Sangma, Mahendraganj-ni MLA Sanjay Sangma, CM-ni jikgipa Mehtab Chandee, a·jani SP Vikash Kumar aro dingtang dingtang department-ni officialrang-ba dongpae bakko ra·angaha.
