Meghalaya BJP dol re∙baenggipa 2024 bilsini election na tarisamsoanirangko dakan baksa Lok Sabha election-o Shillongni Congress MP Vincent Pala ni kosako chegipa ong∙na niksamsoani gnang aro unbaksana re∙baenggipa 2024 bilsini gisepon ong∙nasienggipa Khasi Hills Autonomous District Council (KHADC) ni election naba tarisamsoanirangko dakenga.
Batanggimin state assembly election-o dal∙dalgipa dilgiparang re∙bae dakchakaniko on∙genchimoba aro nanga gita tangka paisarangko jakkale rakbee kam ka∙genchimoba BJP ge 2 seat-kosan chegipa ong∙na gita man∙aiaha. Mikkangchi ong∙nasienggipa parliamentary election aro Khasi Hills Autonomous District Council election na BJP namen rakbee kamko ka∙na nangenga. 2019 Shillong Lok Sabha election o BJP 77,000 na komie vote ko man∙aha, apsan election-o Vincent Pala 4.2 lakh ni gita vote rangko man∙e chegipa ong∙skaha.
Dingtang dingtang tom∙bimongani aro chanchirimaniko constituency ge∙prakon, BJP na kam ka∙enggipa dolrangni mangrakbatroroanina rake kamrangko ka∙angenga ine BJP State Unit-ni President Ernest Mawrie kobor ra∙timgiparangna u∙iataniko on∙angaha. Pala uni constituency na MP ong∙e aro Union Minister ong∙e kam ka∙anio a∙dokni manderangna maming namgniko ra∙bajaha aro uni kamrango name chu∙sokgipa ong∙jaha ine Mawrie agandapangaha.
Centre ni dilgiparangni dilaniko man∙e BJP re∙baenggipa electionrangna chu∙gimik tarisamsoanirangko dakengaha aro re∙baenggipa District Council election na chu∙gimik seat-o BJP candidate rangko chakatatgen. Party ni dilgiparang baksa bang∙gija salni gisepon tom∙bimonganikoba dake election na nangchongmotgipa chanchirimanirangko dakanggen ine Mawrie aganangaha.
