Re·anggipa July 4 tariko Niksamseng Marak-ko ka·saninggija Rehab Centre-o so·ote siatanina Goalpara-ni nangrimgimin A·chik NGO dolrang Goalpara-ni District Commissioner-na chittiko sedoataha. Ia rehab center-o a·sel ong·anian Garo Hills-ni manderangna aro Assam-o donggipa A·chikrangnaba aiao inmanpilaniko ra·baaha. Ia a·selrangni bidingo tarake niroke kamrangko ka·china gita Goalpara-o donggipa A·chik NGO-rang District Commissioner aro Goalpara-ni pulis dolrangko mol·molaniko dakangaha.
Niksamseng Marak-ko so·otgipa manderangko cctv-o nikna man·an baksana ia rehab center-o banga namgija kamrangko Center-ko chalaienggipa aro nirokenggiparangni ka·anirangkoba nikna man·aha. Battanggimin somoirangoba ia rehab center-o banga namgija kamrangko ka·oba Center-ko chalaienggipani donuani a·sel mamingkoba parake ma·sinagita man·jaenggen ine NGO dolrang aganangaha.
So·ota man·gipa uni jikgipa aro bilsi 4 ong·gipa degipako wate re·angaha, ua saksan and nokdangko chalaigipa ong·ani gimin uni nokdangni manderangna tangka paisarangko on·pilskachina NGO dolrang district authority-ko mol·molangaha. Ia obostarangko tarake nirokate rehab center-ko chipate aro uko chalaienggipani licence-ko bon·atchina aro so·ota man·gipa nokdangni manderangna taraken on·pilskaaniko dakchinagita NGO dolrang didiangaha.
