A·dokni Water Resource Minister Comingone Ymbon, SWGH-o mikka jimbee wa·anichi chirang dal·e manderangni gamjinko nisiatgipa biaprangona re·ange nirokeaniko dakangaha. Ia somoio, Minister baksa Salmanpara MLA Ian Botham Sangma, Rangsakona MLA Subir Marak, a·jani DC Hema Nayak, SP Vikash Kumar, Zikzak C&RD Block ni BDO Digonto Hajong aro Betasing C&RD Block BDO Crystal Ripamchi Sangma dongpaanio Flood-affected Scheme-rangni bidingo nirok sandianiko dakangaha.
Dingtang Dingtang Flood-affected Scheme-rang jekai Anangpara-ni Daru Flow Irrigation Project (FIP), Kalaipara ni Rongkai FIP, Purakhasia-ni songrang baksa Darong chibima rikamo land erosion scheme aro Bandoraja FIP scheme-rangko Minister re·ange nipilangaha. Iarang pilakon a·selnikri taripiltaina nanggitikaniko nike State Plan Scheme rangko jakkale tarake taritaichina Minister ge·etataha. Iarangko ru·uta somoina baikamgipa ong·e tarina ma·mong sorkarini scheme-rangni ning·o kam ka·na nanganikoba ua janapangaha.
Una agreba Ampati Division-o kam ka·giparang komiengani gimin dingtang dingtang mandeni bilrangko nanganiko kolgapatna kamrangko bikotna department-ko sorkario janapchina didiangaha. Chiring chibisik jolrangko naljoke rakkiani bidingo manderangna nangchomotgipa mikrakatani program-rangko ong·atchinaba Ymbon aganangaha. Ong·telaigipa a·selrangchi nisiatako man·on a·doko chirangko donchakna rika cho·anirangko nambatatna sorkarini ku·mitchetani bidingoba ua agantalatangaha.
