WGH Gambegre songni ning·o ong·gipa SSA ni Block Mission Co-ordinator office-ko batangimin 2018 aro 2019 bilsio balwarang tarakani a·sel nisiata man·gipako da·onaba tarigija galchipaniko songni manderang parakataha. Ia office noko C&RC block-rango nirokatchinagita didiatahaoba da·onaba maming ja·ku de·anirang dong·ja ine songni manderang matnangataha. Tarigija galchipe donani a·selo mikka balwarangchi nosto ong·dapatako man·e bi·sarangna lekka donchakgipa kutturirangni nokkingrang dongjaha ine uamang u·iataha.
Ia a·selrangni bidingo office-ni daito gnanggiparangna janapeon cyclone-ni nosto ong·atako man·giparangko tarina dorgastoko gale nion maming aganchakaniko man·kuja ine aganangskaaha.
Apsandake, Gambegre songo damsa kamkam donggipa Adhoc U.P school mikka balwachi nisiatako man·e ru·uta bilsirangoni da·onaba maming sorkarinigita dakchakaniko man·jae skul ka·chakna namen neng·nikaniko man·enga. Ia skul nokni do·ga, kelki aro a·parangba be·kningaha aro nosto ong·aha. Uamangni jolo secondary skulrangba dongjae chatro chatrirang chel·a biapchi re·na nang·e neng·nikaniko man·enganina secondary school-ko nangchongmota ine songni manderang janapataha.
Ia obostarangko niate Gambegre jolni manderangni namgnina aro neng·nikanirangko chel·atnagita sorkarioni daito donggipa dilgiparangko ta·rake nirokatchinagita songni manderang mol·molataha.
