Da·al salo Dainadubi PHC-o sanna bannani kamrangko namdapatna man·agita gitalgipa Ambulance-ko on·china Dainadubi Regional Unit-ni AHAM dolrang Chief Minister Conrad Sangma-na chittiko seate mol·molangaha.
Dainadubi PHC-o donggipa Ambulance ko ru·uta bilsirangna jakkalani a·selo nosto ong·anirangko man·engaha ine AHAM dolrang aganangaha. Dainadubi jolo songdongenggipa manderang jelbatahani gimin Ambulance ge·sa mangmang ong·anichi neng·nikanirangko chagrongna nangenganina gitalgipa Ambulance-ko on·dapchina mol·molangaha.
Dainadubi PHC-o kam ka·gipa Doctor aro ka·rimskarangni agananigitade Ambulance ge·sasan ong·ani a·selo sagipa manderangko salruraanioba neng·nikarangko man·enga ine u·iatangaha.
Ia gitalgipa Ambulance-ko on·genchimode jolo songdongenggipa manderangna namen dakchakbeani ong·gen aro sagipa manderangko nangan somoirango salrurae on·a dakchakanggen ineba AHAM Dainadubi Regional Unit-ni President Nirmalson K Marak koborna parakataha.
