Garo Hills a·jarangona dingtang dingtang biaprangoni kamrangko ka·e cha·na niamgri napbagiparangni kosako nirokate champengataniko dakchina AHAM dolrang Director General of Police-na chitti see didiataha.
Da·ororo Garo Hills-ni a·jarangona kamrangko ka·na re·bae niamgri songdongenggipa biaprangara Mendipathar, Resubelpara, Dainadubi, Bajengdoba, Rongjeng, Williamnagar, Nongal, Baghmara, Gasuapara, Dalu, Ampati, Garobadha, Tura, Tikrikilla, Phulbari, Chibinang aro Rongram ong·a. Ia biaprangona niamgri re·bae kamrangko ka·enganiara me·chikrangko naljoke rakkianio neng·nikani ong·an baksana songdongkamenggipa manderangna kam gri ong·atanikoba ra·baenga ine AHAM dolrang janapataha. Indake mikkangchi Garo Hills-o songdongenggipa manderangna neng·nikanirangko ra·bajanagita niamgri kam ka·na napbagiparangko dongimin niamrango pangchake lekka pancharangko nirok sandie champengataniko dakanichi songdongkamgipa manderangna namgija a·selrangoniko warachaksonagita amgen ine janapataha.
Kakketgipa lekka pancharang donggija kamrangko ka·e cha·enggiparangko kam ka·chakgipa biaprangoniko nirok sandianiko dakchinaba AHAM dolrang didiataha. Indake nirok simsaksoanichi Garo Hills-o songdongkamgipa gisiko nanggipa manderangni kamrangko ka·e cha·anio maming neng·nikanirang sokbajanagita champengatanirangko daksona man·gen ine AHAM dolrang u·iatangaha. Ia niamgri re·bae kamrangko ka·enggipa manderangni kosako raka niamko done champenganiko daksochina AHAM CEB H.Q Tura-ni General Secretary Clinton R. Marak a·dokni DGP-ko mol·molangaha.
