Meghalaya Legislative Assembly-ni Committee on Empowerment of Women, me·chikrangni aro bi·sarangni kosako dingtang dingtang a·sel obostarangko chagrongaoniko naljoke rakkiani bidingo Tura Deputy Commisioner-ni office-o tom·e chanchirimangaha. Ia tom·anio WGH aro SWGH a·jani Deputy Commissioner-rang, SWGH-ni SP aro adita official-rang bakko ra·angaha jeon me·chikrangni aro bi·sarangni kosako sinjetaniko on·ani bidingo mongsonggipa ong·e chanchirimangaha.
Ia tom·aniko Committee-ni Member-rang chong·motan Mendipathar-ni MLA Marthon J. Sangma, Mawphlang-ni MLA Matthew B Kurbah, Mawlai-ni MLA Brightstarwell Marbaniang, Nongstoin-ni MLA Gabriel Wahlang aro Umroi-ni MLA Damanbait Lamare-ni dongpaanio Committee ni Chairman aro Sutnga Saipung-ni MLA Santa Mary Shylla dilangaha.
Ia tom·e chanchirimanio dingtangmancha WGH aro SWGH a·ja damgnio me·chikrang aro bi·sarangni kosako kragija dakanirangko nambate nirok simsakna nangani bidingo Santa Mary Shylla janapangaha. Unbaksana indakgipa a·selrangko chagronggiparangna nanganirangko jekai dongchakna nok aro gisiknigita sanna bannaniko on·a committee sorkarina u·iatangna miksongenga ine Shylla aganangaha.
Committee-rangni Tura-ona re·bae chanchirimani somoio, adita salrangna skang Lower Teksragre songo me·chik saksako kragija doka sata man·gipakoba grongangjolaha jekon One Stop Centre, Tura-o sanna bannaniko dakenga. Una agreba ka·saninggija dokako man·gipa me·chikni be·en bimango saknaanirang aditan namkalangaha ineba Shylla agandapangaha.
