Da·al salni bako, Silchotchigre songo donggipa Sonja Wildlife Rescue Centre-oniko gipin biapchina ra·angna am·engani gimin Garo Hills Environment Protection Society (GHEPS), pangchamgipa manderang aro dingtang dingtang NGO dolrang Tura Mission Compound Mason Phillips Academy o tom·e chanchirimangaha.
A·dok sorkari Sonja Wildlife Rescue Centre oniko mang 6 Hurorangko manggni prak dake Guwahati, Lucknow aro Ribhoi Umtrew Meghalaya State Zoo-ona watatna tik ka·angaha. Iani gisepon bang·a A·chik NGO rang, dilgiparang aro songsalni manderang gipin biapchi ra·angna miksonganiko raken jegalanikoba nikangaha.
Indake ong·genchimoba ia centre-ni Hurorangko Ri-Bhoi a·jani Umtrew Meghalaya State Zoo-ona apjitatna maming chanchiani dongkuja ine Chief Minister Conrad Sangma batanggimin salrango parakangskaaha. Huro rangko apjitatna Central Zoo Authority (CZA) janapgenchimoba sorkarikosa apjitatna tik ka·angaha ine agananiara kakketgipa ong·ja ine Sangma aganangaha.
Ia ong·enggipa obostarangko namdapate ja·ku ga·na man·agita da·alo ia tom·aniko ong·atangaha aro ia chanchirimanio dingtang dingtang dolrangni dilgiparang re·bae bakko ra·angtokaha.
