Sonja Wildlife Rescue Centre-o donenggipa Hurorangko Ri-bhoi Umtrew-o gital tarigimin Meghalaya State Zoo-ona apjitatna a∙dok sorkarini kamrangko ka·engahanina, Tura-ni MP Saleng Sangma ma·mong sorkarini Environment, Forest & Climate Change-ni Minister Bhupender Yadav-na chitti sedoataha.
Sangma-ni chittio janapatanigitade, Hurorangna dingtangmancha dongchakna kragipa biaprang gnang jeon uarang buring bolgrimo donge cha·anirangko am·e cha·na man·a. Indake ong·engani gisepon dingtang biapona apjitataniara Hurorangni janggi tanganio neng·nikani ong·naba gnang ine Sangma janapataha.
Huro jatsa matburing ong·a jean a·gilsak gimiko gimaroroangenggipa ong·enganina je biapo da·o donengachim ua biapon manderang simsake ripinge rakkienga. Ia Hurorangko gital biaprangchi apjitatode biaprang melijae be·ennigita sabisirangko man·aba donga jeon uarang bang·e tangbangjawa ine Sangma u·iatangaha.
Iani gisepon a·dok sorkarini Hurorangko apjitatgenchimode uamangna dongtogipa biaprang ong·jae janggitangna neng·nikani ong·naba gnang ine nirokate kamrangko ka·china Sangma didiataha. Unbaksana iani bidingo kragipa ja·kurangko de·e je biapon da·o Hurorangko donengachim ua biapko CZA-nigita nanggipa niamrangko chu·sokatna Sonja Wildlife Rescue Centre-ko taridape apsan biapon donangkuchinaba Sangma mol·molataha.
