Re∙baenggipa Gambegre constituency-o bye election ong∙na amenggipao Dadenggre ni MLA gitcham aro Meghalaya Industrial Development Corporation (MIDC) ni Chairman James P K Sangma na susana ticket on·jani bidingo NPP aro uni nokdangni gisepo meligrikgijaenga ine segatatanina matnangataha. Sangma ni agananigitade adita newspaper-rango aro Shillong Times-o maming ja∙pang ja∙dilrangko name talchengggija gatataniara aiao inmanpilani ong∙a ine koborna parakataha.
Indakgipa news media organization jean bilsi 80 mang ong·nasipilgimin aro senior journalists-rangni dilenggiparangni janerani skanggipa page-o aro social media account-rango mamingkoba talchenggija aro u·ichenggija koborrangko gatataniara namen kratchaani kamsa ong·a ineba Sangma aganangaha.
Gambegre-o susana anga maming chanchia dongja aro darang baksaba agangolporimanirangba dongkujani gisepon manderangni skatang jangbingbanganiko knae koborna parakataniara namen aiao inmanani ong·aha ine Sangma talatanikoba on∙angaha.
Janera rango indake tolgipa koborrangko chapa ka∙atanina sakantina namen talate on·agita ska aro Gambegre bye election-o susana maming chanchiani dongja ine Sangma agandapangaha. Unbaksana party-ni tom·bimonganirango aro an·tangtangrara chanchirimanioba ia election-o susana Sangma nigita maming agananirangba dongja aro kakketgipa kattako talchenggija koborrangko parakatna skang name u·ie ra·chengesa parakatchina didiata aro kakket kattako talgija skatang mandena namgija bimingko ra·bajachinaba Sangma didiatangaha.
